AQSh vizasi uchun qanday hujjatlar kerak? 2026 Checklist

Oldingi maqolamizda AQSh vizasini olish bosqichlari haqida batafsil ma'lumot bergan edik. Ushbu qo'llanmada esa elchixonaga borishdan oldin qanday papka tayyorlashingiz kerakligi haqida eng aniq 2026-yilgi talablarni ko'rib chiqamiz.

1. Majburiy hujjatlar: Elchixonaga nimalar bilan kirish shart?

Ushbu ro'yxatdagi hujjatlardan bittasi kam bo'lsa ham, sizni AQSh elchixonasidagi suhbatga kiritishmaydi:

Amaldagi xorijga chiqish pasporti ("Qizil pasport"): Pasportingizning amal qilish muddati AQShdan qaytib kelishni rejalashtirgan sanangizdan keyin kamida 6 oy kuchga ega bo'lishi kerak. Ichi toza bo'lsa ham, eski (muddat o'tgan) xorijga chiqish pasportlaringiz bo'lsa, ularni ham o'zingiz bilan olishingizni tavsiya qilamiz, chunki ular sayohat tarixingizni (travel history) ko'rsatadi.
DS-160 anketasi tasdiqnomasi (Confirmation page): Anketani to'ldirib bo'lganingizdan so'ng, tizim sizga shtrix-kodli (barcode) bir sahifalik tasdiqnoma beradi. Aynan shu qog'ozni printerdan chiqarib olishingiz shart. Barcha anketani qog'ozga chiqarish shart emas!
Suhbatga yozilganlik xati (Appointment Confirmation): Konsullik to'lovini amalga oshirib, suhbat sanasini belgilaganingizni tasdiqlovchi xat.
Bitta fotosurat (5x5 sm): Oxirgi 6 oy ichida tushirilgan, oq fonda, rangli, ko'zoynaksiz tushirilgan rasm. Odatda DS-160 anketasini onlayn to'ldirganda rasm yuklanadi, lekin ehtiyot shart sifatida bitta qog'oz nusxasini olib borish talab etiladi.

2. Qo'shimcha (Lekin hal qiluvchi) hujjatlar: Moliyaviy va ijtimoiy holatni isbotlash

Konsul suhbat davomida yuqoridagi 4 ta majburiy hujjatdan tashqari umuman boshqa hujjat so'ramasligi ham mumkin. Ammo u sizning anketangizda shubha ko'rsa, har qanday isbotni talab qilish huquqiga ega. Shuning uchun, O'zbekiston bilan kuchli aloqalaringiz (Ties to home country) borligini isbotlovchi quyidagi hujjatlarni tayyorlab borish qat'iy tavsiya etiladi:

Moliyaviy barqarorlikni ko'rsatuvchi hujjatlar:

Bank hisobidan ko'chirma (Bank Statement): Faqatgina hisobdagi qoldiqni emas, balki oxirgi 3-6 oylik pul aylanmasini (kirish-chiqish) ko'rsatuvchi rasmiy ko'chirma. Sayohatingiz uchun yetarli pulingiz borligi mantiqiy bo'lishi kerak.
Ish joyidan ma'lumotnoma: Kompaniya blankasida, muhr bilan tasdiqlangan, sizning lavozimingiz, ishga kirgan sanangiz, o'rtacha oylik maoshingiz va sayohat davrida sizga ta'til berilganligi haqidagi tasdiqxat.

Oila va ko'chmas mulk hujjatlari:

Ko'chmas mulk kadastr hujjatlari: Uyingiz, yer uchastkangiz yoki noturar joyingiz bo'lsa.
Avtomobil texpasporti: Agar mashinangiz bo'lsa.
Oilaviy munosabatlar: Nikoh guvohnomasi va farzandlarning tug'ilganlik haqidagi guvohnomalari (ayniqsa siz ularni O'zbekistonda qoldirib, o'zingiz sayohatga ketayotgan bo'lsangiz).

3. Turli toifalar uchun maxsus hujjatlar ro'yxati

Tadbirkorlar va Biznes egalari uchun:

Agar siz xususiy tadbirkor bo'lsangiz (MChJ, YaTT), quyidagilar kerak:

Kompaniyaning davlat ro'yxatidan o'tganligi haqida guvohnoma (Guvohnoma).
Korxona ustavining nusxasi (Siz ta'sischilardan biri ekaningizni isbotlash uchun).
Kompaniyaning oxirgi oylardagi soliq to'lovlari (Sverka) va bank hisob aylanmasi.

Talabalar uchun:

O'quv yurtidan (Universitetdan) ma'lumotnoma (qaysi kursda, qanday fakultetda o'qishi ko'rsatilgan).
Reyting daftarchasi yoki baholar (transkript).
Homiylik xati (Sponsorship Letter): Talabaning o'z daromadi bo'lmagani uchun, ota-onasi yoki yaqin qarindoshi safar xarajatlarini qoplashini bildiruvchi xat va ularning ish joyi, bank ma'lumotnomalari.

Nafaqaxo'rlar va Ishlamaydiganlar uchun:

Nafaqaga chiqqanlikni tasdiqlovchi guvohnoma.
Pensiya tushadigan plastik kartaning bank ko'chirmasi.
Agar sayohatni farzandlari qoplab berayotgan bo'lsa, ulardan homiylik xati (Sponsorship letter) va ularning daromad hujjatlari.

4. Qanday hujjatlarni olib borish tavsiya etilmaydi?

Xavfli xatolar!

Quyidagi harakatlar sizning viza olishingizga faqatgina zarar yetkazadi:

Soxta (Poddielka) hujjatlar: Soxta bank ko'chirmasi yoki ish joyidan yozib olingan qalbaki spravkalar aslo qilmang. Elchixona ularni osonlik bilan aniqlay oladi va bu sizga AQShga kirish uchun butun umrlik taqiq (Blacklist) qo'yilishiga sabab bo'lishi mumkin.
Sotib olingan aviachiptalar: U.S. Department of State rasmiy ravishda viza qo'lingizga tegmagunicha samolyot chiptalarini xarid qilmaslikni maslahat beradi. Chipta sotib olib qo'yganingiz konsulga bosim o'tkazmaydi, ba'zida aksincha ta'sir ko'rsatadi.
To'langan mehmonxona bronlari: Faqat sayohat rejangiz bo'lsa yetarli. Pul to'lab qo'yish majburiy emas.

5. Hujjatlarni ingliz tiliga tarjima qilish shartmi?

AQShning O'zbekistondagi (Toshkent) elchixonasiga murojaat qilayotgan bo'lsangiz, ko'pincha qo'shimcha hujjatlaringiz (ish joyidan ma'lumotnoma, bank ko'chirmasi, kadastr) o'zbek yoki rus tillarida bo'lishi qabul qilinadi. Ularni har birini notarial tarjima qilib kelish majburiy talab emas. Biroq, agarda siz uchinchi davlatdagi (masalan, Qozog'iston, Turkiya yoki Dubaydagi) AQSh elchixonasiga murojaat qilayotgan bo'lsangiz, mahalliy xodimlar hujjatlarni tushunishi uchun ularning ingliz tilidagi tarjimasi kerak bo'lishi mumkin.

DS-160 anketasi esa to'liq 100% ingliz tilida to'ldirilishi shart.

6. Ko'p beriladigan savollar (FAQ)

1. Suhbatda konsul hujjatlarimni umuman so'ramasa nima qilaman?

Bu juda ko'p uchraydigan holat. Konsul ko'pincha siz to'ldirgan DS-160 anketasi va yuzma-yuz muloqotga ishonadi. Agar u hujjatlaringizni ko'rishni xohlamasa, bu yomon belgi emas. Faqat u so'raganidagina papkangizdan kerakli hujjatni chiqarib bering, o'zingiz majburlab tiqmang.

2. Qancha pul ko'rsatgan ma'qul? Masalan 10,000$ yetarlimi?

Bu sizning safaringiz davomiyligi va maqsadingizga bog'liq. Agar siz AQShga 2 haftaga turizm uchun ketayotgan bo'lsangiz, aviachiptalar (~$1,200), mehmonxona (~$1,500) va kundalik xarajatlar uchun pulingiz bo'lishi mantiqan to'g'ri. $10,000 odatda sayohat xarajatlarini bemalol qoplaydigan summa hisoblanadi. Lekin, eng muhimi — bu pul sizning rejangizga va anketadagi maoshingizga mos kelishi kerak.

3. Taklifnoma (Invitation Letter) bo'lishi shartmi?

Yo'q, shart emas. Agar do'stingiz yoki qarindoshingiz bo'lsa taklifnoma yozib yuborishi mumkin. Lekin oddiy sayyoh (turizm, Grand Canyon va Nyu-Yorkni ko'rish) uchun hech qanday taklifnoma kerak emas.

Hujjatlarni to'g'ri shakllantirib bo'lgach, navbatdagi eng muhim bosqich — suhbatga (intervyu) tayyorgarlik hisoblanadi. Batafsil AQSh vizasi intervyusida tushadigan savollar maqolamiz orqali suhbat texnikasini o'rganishingiz mumkin.

AQSh vizasi uchun qanday hujjatlar kerak? 2026-yilgi to‘liq checklist

Mundarija